نەسێبەر، نەبوون

نەسێبەر، نەبوون

ماوم

وەك دوكەڵ و تەم

بەبێ‌ ئەوەی لەم گۆڕستانەدا گۆڕم دیاربێت

لەناو نەبوونێكدا… ماوم

ئاوادەبم بەبێ‌ ئەوەی دیار نەمێنم

ئاوادەبم بەبێ‌ ئەوەی ناونیشانێكی هەمیشەیم هەبێت

ئاوابوونێك نە ئاوابوونە، نە نەبوون!

مێژوو پشوێك نادات تا من دەركەوم

بەهاران رەنگێك نایەت لە سەوز نەچێت، تا من بڕوا بە بوونێكی تر بكەم

هیچ وەرزێك وێنەی خۆی ناگۆڕێت، تا من بەبەرگێكی ترەوە دەست پێبكەم

ئەوەی لە باخچەكان هەڵدەوەرێت، گوڵ نییە، وێنەی ژیانە

ئەوەی لەناو دەماری رۆژەكاندا دێت، ساتەكان نین، خوێنێكی كۆنە خۆی دووبارە دەكاتەوە

ئەوەی بە دەستی مرۆڤ دروستدەكرێت، بۆ ونكردنی مرۆڤە

ئەم دەرگایانە مرۆڤ خۆی دایخستن

ئەم دەرگایانە مرۆڤ خۆی كلیلەكەیانە

ئەم بوونە ئیتر بوونێك نییە دەست لە زبری حەقیقەتەكەی بدەیت،

دەمێنین بێ‌ ئەوەی هەست بە مانەوە بكەین

ئاوا دەبین بێ‌ ئەوەی گەڕانەوە بێت بۆ مەرگ.

_ _

ئەم دونیایە لە شوێنەوە بوو بە وێنە

دەبێت بگەڕێمەوە بۆناو خەیاڵەكان

دەبێت بگەڕێمەوە بۆناو بیركردنەوەكان

هەندێك هەن ماون و هەست بە بوونیان ناكرێت

هەندێكیش هەن نەماون، هەست بە درەوشانەوەیان دەكرێت

گەڕانەوە بۆ ناو تاریكییەكانی مرۆڤ، شكاندنی وێنەی دونیایە

هەندێك هەن دەمێنن بۆ ئەوەی چیرۆك بگێڕنەوە

هەندێكیش هەن دەمرن تا ببن بە چیرۆك

داگیرسانی ئاگرێك پێش هەمووكەسێك خۆت بسوتێنێت، خانەدانییە بۆ مانەوە

لە ئاوابووندا سێبەر شانشینە

ئەوەی بۆ درەوشانەوە دەگەڕێت، با بەكۆڵانە تاریكەكانی ناوەوەی خۆیدا تێپەڕێت

ئەوەی دوای خۆشەبختی دەكەوێت، با بیستن لە بیر خۆی بباتەوە

بێدەنگی ئاگرێكە هەركەسێك لێیەوە هاتە دەر، دونیا ناتوانێت بوونی بكات بە سێبەر.

_ _

شەڕەكان بوون بە وێنە

مەرگ بوو بە وێنە

هەموو شتێك بوو بەوێنە، لە كوێ ژیانی حەقیقی بدۆزمەوە؟

گەمارۆ دراین بە كەلوپەل

گەمارۆ دراین بە ئومێدی كاڵ، بە زەردەخەنەی كورتی خۆشبەختی

گەمارۆ دراین بە درێژكردنەوەی ناوەكان بەبێ‌ ناسینیان

گەمارۆ دراین بە زمانێك كە زمان نییە و حورمەتی زمانی شكاند

لەناو ئەم گەمارۆدانەدا، بە بێدەنگ بۆ مرۆڤێك دەگەڕێم لە ژیانەوە نزیكبێت!

ئەستێرەكان كاتێك وندەبن روناكی دەركەوێت، مرۆڤیش كاتێك وندەبێت بەبێ‌ سەیركردنی خۆی تەماشای دونیا بكات

لەكاتی ئاوابووندا كوندەپەپوو ئەدا لە شەقەی باڵ، مرۆڤیش لەكاتی درەوشانەوەدا

روناكی مانگ بە تاریكی شەو دەپێورێت، ئەی ئەم سەردەمەش بەچی؟ 

لەگەڵ شتەكاندا، لەگەڵ وێنەكاندا، ئەوانە دەبینم لەناو گۆڕی ژیاندا بۆ دواسات زەرخەنە دەكەن

ماوم

وەك كیمیاگەرێك ئاوابوون و نەبوون تێكەڵدەكەم، تا حەقیقەتی ژیان بدۆزمەوە

بەبێ‌ ئەوەی لەم گۆڕستانەدا گۆڕم دیاربێت… ماوم.

                                  نەبەز گۆران