روناكییەك لە منا هەڵەكا

روناكییەك لە منا هەڵەكا

                   ڕوناكییەك لە منا هەڵەكا

1

ئاخری دێتەوە
وەك هەتاو ئەدا لە پەنجەرەی دڵم
وەك با
گوزەرئەكا بەنێو پەنجەكانی تەمەنما
وەك كۆتر
هێلانە ئەكا لە بوونما.

كەس وەك من تۆی خۆشناوێ
ئەی ئەوەی سەر لە تەنیاییەكەم ئەشێوێنی
كەس وەك من غەریبی تۆ ناكا
ئەی ئاوێنەم بۆ بینینی خۆم.

_ _

باكەس خەمی منی نەبێ‌
باكەس بیرم نەكا
نام پرژێ‌ بەسەر سێبەرەكانەوە
نام پرژێ‌ بەسەر دورییەوە
ئەم هەموو تەمەنەچی لێكەم؟ ئەم هەموو ئاگرە چی لێبكەم؟!

گەنجیەتی یانی گۆچانێك بەدەست رۆیشتنەوە بەرەو روناكی
یانی ڕاكردن لە منداڵی
یانی خلۆر بوونەوە بۆكەنارەكانی ئەزموونی ژیان.

2

سەیركە….
وەك فەرشچنێك روناكی ئەچنم
ماڵێكم هەیە نزیك لە ژیان
خەمێكیش هێندەی ئاسمان بەرین!
هاوینان دڵی ماڵەكەم گەرمە و زستانانیش رەق هەڵگەڕاوە
چەن تەنیاییە ماڵەكەم
چەن فڕینی لێدێ‌ ماڵەكەم،
ئەوەندە نزیكم لە زەمینەوە بۆنی نیشتیمانم گرتووە
من لە ژێر زەمینێكا ئەژیم، شەوان گوێم لە ترپەی دڵی نیشتیمانە
ئەوەندە دورم لەم رۆژگارە بەتەنیاییەكەمدا دەمناسیتەوە.

گەر دەتەوێت بزانیت من كێم؟! دەست بخەرە سەر دڵی ژیان گوێ‌ لە دەنگم بگرە.

كەس وەك من بیری تۆ ناكا
ئەی ئەوەی ماڵی بوونم ئاوەدان ئەكەیتەوە.

_ _

من هەمیشە وام
عادەتم گرتووە بە بێ‌ تاقەتییەوە
بڕێ‌ جار دڵتەنگی تالێواری گریان ئەمبا
بڕێ‌ جاریش بێدەنگیم ئەدا لە شەقەی باڵ
خەونەكانم لێ‌ بتەكێنە هیچم پێوە نامێنێ‌
وەلێ‌ ئاخری ڕوناكییەك لە منا هەڵەكا.

ئەزانم ….
دەمەو عەسرانێك دێتەوە خەوی ئەم تەنیاییەم تێكەدا
دەستێك ئەخاتە ناو گەنجیم و پڕم ئەكا لە نەشئەی گۆرانی

گوێ‌ لە ترپەكانی دڵم بگرە،
بزانە دەنگی پێی خۆت نابیستی؟
گوێ‌ لە گەنجیەتیم بگرە، بزانە نیشتیمان داخت ناكا؟
گەر وەك هەنارێك شەقم كەن، گیانم پڕە لە خۆشەویستی
نزیكترین دۆستم سێبەرەكەمە
لەوەتەی هەم كەوتوومەتە شوێن خەونێك، نامگەیەنێت بە بوون!
وەك موعتادێك گۆرانی ئەلێم بۆ ئاگایی.

((گۆرانی وتن هەستكردنە بە تەنیایی.))

3
وەك دەمەوبەیانم…
ڕوناكییەك لە منا هەڵەكا و هەناسەم بۆنی ژیانی لێدێ‌
ڕەشەبایەك لە سینەماییە، لەهەركوێ‌ بم حەزم بە تێكدانی كەپرە كۆنەكانە
لەهەركوێ‌ بی ئەبمە ڕوناكیت ئەی ئاوازەكەی سینەم، ژیان…

كەس وەك من خەمی تۆی نییە
ئەی ئەوەی بۆ هەرشوێنێك بچیت، بە ئاسمانی خەیاڵی منەوە دەدرەوشێیتەوە
كەس وەك من ئاگای لە تۆنییە
ئەی ئەوەی بێ‌ ئاگای لەم ئاگایە.

_ _

سەر لە ئێوارەیەك دێتەوە
تا ئەو دێتەوە من هەرئاوا ئەبم، تا ئەو دێتەوە من پیرەبم
تا ئەو دێتەوە من بووم بە چیرۆكی برینێك.

ئەمرم…
وەك گەنجێك لە داخی نیشتیمان
وەك وشەیەك لە نێوان دوو كەوانەدا ‌
وەك كوردێك لە غەریبیدا، لە بێشوێنیدا
تا نەمرم…
نازانن خاكەكەی ناخی من چ گەوهەرێك بوو
نازانن خەونەكەی ناو من جوانتربوو لە گوڵەكان
كەمردم
ئەزانن ئەوەی نووسیمەوە حورمەت گرتنی مرۆڤ بوو.

كەمردم
ژورە بچوكەمەم كۆبكەنەوە و
بەهاوڕێكانم بڵێن: ژیانم خۆشدەویست
كەمردم
ژێرزەمینەكەم داخەن و دەرگای دڵتان بكەنەوە
كەمردم
گۆرانی بڵێن، ڕاكەن بە كۆڵانی ئاگاییدا
وێنەی كورد پیشانی مەرگ بدەن، با تەریق بێتەوە
بەیانیانی زوو گوێ‌ لە داكیتان بگرن بامنداڵیتان گەورە نەبێت
لە لۆچی سەر تەوێڵی باوكتان وردببنەوە، تانزیك ببنەوە لە زبری ژیان.

_ _

هەتا نەمرم
دەنگی ئەم غەریبەیە ناگات
كەمردم
تێدەگەن
ڕوناكییەك لە مندابوو وەك مانگ كوچە تاریكەكانی مرۆڤی روناك ئەكردەوە.

كەس وەك من ڕوناك نییە بۆ ژیانت
ئەی ئەوەی دوریی و نزیكیت، جوانییەكەت لە دڵی مندا كاڵناكاتەوە
سەیركە…
چ ڕوناكییەك لە منا هەڵیكردووە.

نەبەز گۆران
2010

تابلۆ: رۆستەم ئاغەلە