ماندوو نەبی حەسەن

ماندوو نەبی حەسەن

                           ماندوو نەبی حەسەن

سڵاو حەسەن…
حەزناكەم وات پێبڵێم،
بەڵام ئەم دونیایە لە دڵەوە نزیكە، بەس من دڵم شكا
چارە نییە، دەبێت لە گۆشەی شەقامێكدا راوەستین و
بەنیگەرانییەوە سەیری رۆیشتنی تەمەن بكەین
حەسەن…
حەزناكەم وات پێبڵێم،
بەڵام هەندێكمان بۆ گەیشتن بە گوڵێك، باخچەكەی تەمەنی خۆمان وشككرد
هەندێكمان مانگ فریوی داین و ئەستێرەكەی دڵی خۆمان كوژاندەوە
هەندێكی ترمان، لە داخی ساردو سڕی ئەم سەردەمە، ئاگری تەنیاییمان داگیرساند
هەندێكی ترمان، بەبێ‌ هەواڵی هاتنی شەڕ، سەنگەرەكەی خۆمان جێهێشت!
سڵاو حەسەن..
حەزناكەم وات پێبڵێم:
بەڵام دڵی ئەم دارستانە لەوە وێرانترە
بە خوێندنی بولبولێك ئاوەدان ببێتەوە.
_ _
بروام پێبكە…
بروام پێبكە حەسەن…
گۆرانی وتن بۆ ئەم نیشتیمانە، ئەوپەڕی گاڵتەكردنە بە ژیان
ئێمە بۆ گەوهەر ناگەڕێین، بۆ ئەوە دەگەڕێین خۆمان بدۆزینەوە
ئێمە بیری منداڵی ناكەین، بیری ئەو خۆشبەختییە دەكەین بە گەورەیی نایدۆزینەوە
ئێمە رەنگەكانی پاییزمان خۆشناوێن، ئەو وەرینەمان خۆشدەوێت برینمان بیردەخاتەوە
بڕوام پێبكە…
بڕوام پێبكە حەسەن…
ناهێڵن لەناو سنگی ئەم نیشتیمانەدا دەنگی ترپەی ئومێد ببیستین!
هەستدەكەم ئەوەندە دوای ئاسودەیی كەوتین، ئیتر كاتی ئەوەیە جێیبهێڵێن
ئیتر لەبری پەنجەرەكان، دەبێت دەلاقەی ئاگایمان بكەینەوە
لەبری گۆرانییەكان، دەبێت ئیتر گوێ‌ لە شەقەی باڵی فڕین بگریت
لەبری یار چرای هوشیاری لە مەیخانەی دڵدا هەڵكەین
بڕوام پێبكە حەسەن..
ئەم رۆژگارە هەر بۆ ئەوە باشە لە دورەوە سەیری بكەیت و
بەشێوەی رۆیشتنەكەی پێبكەنیت.
_ _
سەیركە…
سەیركە حەسەن…
ئەم نیشتیمانە پڕە لەو درەختانەی چارەنووسیان بەستراوە بە رەنگی گەڵاكانیانەوە!
ئەم شارە پڕە لەو مرۆڤانەی، ژیانیان وەك روخساریان لۆچی تێكەوتووە
ئەم شەقامانە پڕن لەو رێبوارانەی، تەواوی دێڕی تەمەنیان پشویەكی تێدا نییە
سەیركە…
سەیركە حەسەن…
من قافڵەیەك دەبینم، بە پشتی ئەم رۆژگارە بارەكەی دەگوازێتەوە
من كەسانێك دەبینم، بۆ بینینی جوانی خۆیان، ئاوێنەی دڵی ئێمە دەشكێنن
كەسانێك دەبینم، هەتا زیاتر خۆیان برازێننەوە، ژیان شێواتر دەردەكەوێت
سەیركە حەسەن..
بەم هەموو توڕەبوونەوە
ئەتوانیت ئەم سەردەمە بەتۆزی سەر پەڕەی گوڵێك بخنێكنی
ئەتوانیت ئەم برینانە، بە ئاوازی پێكەنینێك لەبیر ببەیتەوە
ئەتوانیت بە هەڵكردنی چارۆكەیەك، گاڵتە بە رەشەبا بكەیت.
_ _
ماندوو نەبی…
ماندوو نەبی حەسەن…
ئەوەی بۆ هەمیشە ناهێڵێت لەبیربكرێین،
ئەو شەوانەیە ئەستێرەكەی تەنیاییمان تێیدا ئەدرەوشێتەوە
ئەو رۆژانەیە لەترسی ونبوون، خۆمان لەم سەردەمە دەشارینەوە.

                                                                           نەبەز گۆران

پێشكەشە بە(حەسەن)ی لای (ئیراهیمی گەوهەر فرۆش) وێنەكە من و حەسەن.